3 Dääg uff dr Gass
Sujet: MS100
Zeedel
Eine Seefahrt, die ist lustig! Eine Seefahrt, die ist schön!
Denn da kann man fremde Länder und noch manches and’re sehn!
Holahii, holahoo, holahiahiahiahiahiahiahoo!
Vor 100 Johr haisst’s: «Laine los!»
Und d Schnurebegge stäche in See.
Der Draum vo Freyhait, dä isch gross.
Starte duet e Johrhundert-Odysee.
S Meer isch wild, d Fahrt isch ruppig,
Hochi Wälle, Salzwasser im Muul.
Und unsri Bärt, die waggse struppig.
S Seemännerlääbe, daas isch cool!
Al die willen te kaap’ren varen moeten manne met baarden zijn!
Alle, die mit uns auf Kapernfahrt fahren, müssen Männer mit Bärten sein!
Jan, Pier, Tjoris en Corneel, die hebben baarden, die hebben baarden,
Jon, Paul, Oli und Cornel, die haben Bärte, sie fahren mit!
D Motore vo der MS 100, die sinn alt,
Dien au zimmlig arg scho tschättere.
Dä ewig Rhythmus gfallt is aber halt!
Mer dien Seebäär-Lieder schmättere,
Lutt singe, amme deent’s wie Grehle,
Das duet is halt ebe hailloos beseele,
Das git aber au uusdroggneti Kehle,
Dergege hilft nur: Fläsche uushehle!
Gäll: Nääbe Whisky, Rum und Wyy,
Darf ’s au Cola, Citro oder Ystee syy.
(Dä letscht Zwaizyyler stoht, hejo,
Explizit fir unseri Jungi Garde do!)
Soon may the Wellerman come to bring us sugar and tea and rum
One day, when the tonguin’ is done. We’ll take our leave and go.
D Fahrt goht wytter, immer wytter,
Unter Volldampf und mit Karacho.
Es goht is iberhaupt nit schytter,
Drotz 100 Johr scho uf em Tacho!
Scheeni Erlääbnis mit de Kolleege,
Uff em grosse, wytte, wilde Meer.
Ab und zue anere Küschte aaleege.
S Haafekneipelääbe, gfallt au sehr.
Junge, komm bald wieder, bald wieder nach Haus!
Junge, fahr nie wieder, nie wieder hinaus!
Ich mach’ mir Sorgen, Sorgen um dich,
Denk auch an morgen, denk auch an mich.
Junge, komm bald wieder, bald wieder nach Haus!
Junge, fahr nie wieder, nie wieder hinaus!
Noh lange Fahrte, stirmische Zyte,
Haimeszue zieht’s is wildi Rueche,
Zem d MS 100 z’iberhole und refitte
Und neyi Crew-Mitglider z’ sueche.
Aimool im Johr, do wämmer zrugg!
Mer dien anggere am Haimethaafe.
Minschter, Rothuus, Mittleri Brugg,
Härzschlag in heggschter Oggtave.
Statt sunscht der Atlantisch Ozean,
Duet’s do zwar «nur» der Birsig sy.
Und statt mit unserem grosse Kahn,
E gmietlig Fähri-Fährtli uf em Rhy.
Fährimaa, hösch Fährimaa, wo das Schiffli styyre kaa,
Fährimaa, hösch Fährimaa, jo Di mecht y syy!
Au Seemänner mache Morgestraich!
Mer erwyyse der Frau Fasnacht d Ehr.
Mer drummle, pfyffe, d Gnej sinn waich.
Vergässe sinn grad d Stirm und s Meer.
Mer gniesse drei Dääg d Fasnachtsluft.
Der Kai isch d Gass, d Kombüse d Baiz.
Und nääbe unserer alte Seebäär-Kluft,
Het au e Goschdym stargg sy Raiz:
Mer sinn Affe, Zwärgli, Mumie, Ritter.
Und dooti Rinder, wo no Gille stingge,
Eelversyychti Veegel, brutal-bitter,
Mer sinn d Queen, wo duet wingge,
Gäng-Kumpel zem «e-Trotti»-Gschyss,
Als Freddie isch s Staubsuugere top,
Als Elvis Presleys laufe mer in wyss,
Und dräggig als Baumaischter Bob.
Kääfer, Seggtebrieder, Killergurgge,
Samt Böötli dien mer ko als Eskimo.
Als sääbelrasslendi Pirate-Schurgge.
Micky Maus und Miedling kemme no!
Und, darfsch’s jo fascht nimmi verzelle,
Mer ’s do aber doch erwähne mien:
D Sujet-Kommission het au mol welle,
Ass mer frehlig Indianerlis spile dien.
Dasmol haisst s Motto jo vom Comité:
«Blyyb verspiilt», das lychtet sofort yy;
Denn unser Motto haisst syt eh und je:
«Bi uns derfe au Männer no Buebe sy!»
I heard, I heard the old man say, hey. John Kanakanaka tura yay.
Today, today is a holiday. John Kanakanaka tura yay.
Tura yay, oh, tura yay. John Kanakanaka tura yay.
«100 Johr» stoht uf em Meile-Zeller!
Allewyl mit Elan und mit vyyl Pfuus.
Und als glaine Hiwyys und Uffsteller:
’S goht wytter: «Volli Kraft voruus!»
Ob Sturmwind oder Nääbelschwaade,
Ob Wällegang, Haagel oder Gwitter,
Mer heebe zämme als Kameraade:
Stamm, Jungi, Schlurbbi und Sirkritter.
S Meer isch uns’re Schiggsaalsfaade,
S zwait Zentennium stoht jetzt bevor.
S Schiff wird mit neye Gschichte glaade.
Mit Vollgas in die näggschte 100 Johr!
Uf der «MS 100», sinn d Begge dehai. Und si nämme no aine oder au zwai.
Uf der «MS 100», sinn d Begge dehai.
Und sy nämme no aine und finde nimm hai…
Ebbis isch au jedem alte Seebäär klar:
Kasch um die ganzi Ärdkugele dampfe,
Doch nyt isch so scheen und wunderbar,
Wie z’Basel dur s Räpplimeer z’stampfe!
D Ladärne-Usstellig isch vom Fasnachts-Mändig znacht bis am Mittwuch demorge wie gwohnt uf em Minschterplatz. Zue de glyche Zyte kame uf em Kasärne-Hof Wääge und Requisite go bestuune.
D Zeedellääsede isch am Sunndig noh der Fasnacht, am 1. Meerz,
vom finfi bis am siibeni zoobe, in der Baseldytsche Bihni (im Lohnhof 4).
D Foyer-Bar isch vom vieri ewägg offe und der Yydritt isch frey.
Wo Buebe no Buebe dörfe si: Bisch e luschtige Bueb und wottsch Fasnacht mache, denn mäld Di doch grad diräggt bi uns: jungigarde@schnurebegge.ch Mir freuen is uff Dii!